អន្តរជាតិ៖ ប្រទេសវៀតណាមនឹងបើកជើងហោះហើរអន្តរជាតិដែលមកប្រទេសនេះឡើងវិញហើយចាប់ពីថ្ងៃទី១៥ ខែកុម្ភៈ ក្រោយពីបានបិទដោយសារតែជំងឺរាតត្បាតកូវីដ-១៩។

លោក Dinh Viet Son អនុប្រធានរដ្ឋបាលអាកាសចរណ៍ស៊ីវិលវៀតណាមបាននិយាយថា វៀតណាមនឹងដកការរឹតបន្តឹងលើជើងហោះហើរអន្តរជាតិចាប់ពីថ្ងៃទី១៥ ខែកុម្ភៈតទៅ។ លោកថា ប្រទេសផ្សេងទៀតបានបើកជើងហោះហើរជាមួយវៀតណាម ហើយមានតែប្រទេសចិនប៉ុណ្ណោះដែលមិនបានយល់ព្រមក្នុងការបន្តជើងហោះហើរពាណិជ្ជកម្មជាមួយវៀតណាម។

នាថ្ងៃទី១១ ខែកុម្ភៈ ក្រសួងដឹកជញ្ជូនបានចាត់ឱ្យរដ្ឋបាលអាកាសចរណ៍ស៊ីវិលវៀតណាមជួបពិភាក្សាជាមួយអាជ្ញាធរអាកាសចរណ៍នៃប្រទេស និងដែនដីនានាស្តីពីការបន្តជើងហោះហើរអន្តរជាតិធម្មតាដែលមានជើងហោះហើរត្រង់ទៅកាន់ប្រទេសវៀតណាមមុនពេលមានរោគរាតត្បាត។

វៀតណាមបានចាប់ផ្តើមដំណើរការជើងហោះហើរអន្តរជាតិបណ្ដោះអាសន្នឡើងវិញជាបណ្តើរៗ ចាប់ពីដើមឆ្នាំនេះ ខណៈពេលដែលបន្ធូរបន្ថយលក្ខខណ្ឌតម្រូវឱ្យធ្វើចត្តាឡីស័ក។

ប្រទេសវៀតណាមបានកត់ត្រាករណី Covid-19 ចំនួន ២,៤លានករណីចាប់តាំងពីជំងឺរាតត្បាតបានចាប់ផ្តើម និងមានអ្នកស្លាប់ជាង ៣៨ ០០០នាក់ ខណៈមនុស្សប្រមាណ ៧៤,៦ លាននាក់បានទទួលវ៉ាក់សាំង កូវីដ-១៩ យ៉ាងហោចណាស់ពីរដូស៕